АДУКАЦЫЯ ПРАЗ УСЁ ЖЫЦЦЁ…

Ці працуе адукацыя дарослых? Якая карысць ад яе? – менавіта гэтыя і шэраг іншых пытанняў гучалі падчас прэзентацыі еўрапейскай прэміі Грундтвіг, якая адбылася 13 лютага 2015 г. у Мінскім міжнародным адукацыйным цэнтры імя Й.Рау. Аб сваім удзеле ў прэзентацыі нам распавёў Уладзімір Александронец, куратар Гомельскага раённага клуба ЮНЕСКА “Наш час”.

Прэзентацыя прэміі Грундтвіг Еўрапейскай асацыяцыі адукацыі дарослых была арганізавана Прадстаўніцтвам Нямецкай Асацыяцыі народных універсітэтаў у Рэспубліцы Беларусь. Істотным момантам гэтай імпрэзы стаў удзел у ей Прэзідэнта Еўрапейскай асацыяцыі адукацыі дарослых Пера Палудана Хансэна.

На мерапрыемстве прысутнічалі прадстаўнікі беларускай экспертнай супольнасці, мясцовых органаў улады, дзяржаўных і недзяржаўных арганізацый сферы адукацыі, навукі, культуры і сацыяльнай абароны. Актыўны інтарэс з боку ўдзельнікаў быў выкліканы магчымасцю з першых вуснаў даведацца аб Еўрапейскай асацыяцыі адукацыі дарослых, а таксама аб прэстыжнай еўрапейскай прэміі Грундтвіг, якая штогод адзначае дасягненні ініцыятыў у галіне адукацыі дарослых.

Удзельнікаў прэзентацыі віталі прадстаўнік Пасольства Германіі Аніка Шэфер, каардынатар рэгіёна Беларусь–Украіна–Малдова Інстытута міжнароднага супрацоўніцтва Нямецкай асацыяцыі народных універсітэтаў Беціна Бранд.

Значнай часткай мерапрыемства стала таксама прэзентацыя праекта “Выганашчанская фартэцыя” (рэалізаванага на тэрыторыі Івацэвіцкага раёна Брэсцкай вобласці), які быў удастоены прэміі Грундтвіг 2014. Конкурс праектаў Грундтвіг у 2014 годзе быў накіраваны на ўкараненне ідэі аб тым, што пры дапамозе стварэння магчымасцей для пазнання адзін аднаго і дыялогу, адукацыя дарослых можа прасоўваць ідэю міру і адзінства ў Еўропе.

Найбольш значныя тэмы ў галіне адукацыі дарослых у Еўропе былі прадстаўлены Прэзідэнтам Еўрапейскай асацыяцыі адукацыі дарослых Перам Палуданам Хансэнам (Данія). Ён распавёў аб мэтах, прынцыпах работы і структуры асацыяцыі, прывёў прыклады праектаў. Асаблівую ўвагу эксперт удзяліў тэме адукацыі на працягу ўсяго жыцця. “Бесперапынная адукацыя, - па словах П.П. Хансэна, - гэта інструмент, які садзейнічае паляпшэнню якасці жыцця грамадзян ва ўсіх яго праявах”.

Літаральна праз некалькі дзён, 18 лютага 2015 г., тэма адукацыі дарослых была працягнута Гомельскім раённым клубам ЮНЕСКА “Наш час”. На сустрэчы клуба, якая адбылася ў Гомельскім раённым Доме культуры, была прэзентавана новая праграма клуба “Адукацыя праз усё жыццё”. Мэтай новай праграмы клуба ЮНЕСКА “Наш час” з’яўляецца прапаганда ідэі адукацыі і развіцця на працягу ўсяго жыцця. Сябры клуба ставяць перад сабой задачы фарміравання ўстойлівых ведаў і каштоўнасных установак аб адукацыі як універсальным праве чалавека, правядзення цыклу навучальных заняткаў аб падыходах да адукацыі на працягу ўсяго жыцця, фарміравання асабістых і прафесійных кампетэнцый, прасоўвання ідэі бесперапыннай адукацыі на працягу ўсяго жыцця.

Далучыцца да ўдзелу ў праграме можа кожны жадаючы жыхар Гомельскага раёна. Для гэтага варта сачыць за навінамі клуба ЮНЕСКА “Наш час” на старонках яго блога http://nasch-chas.blogspot.com.