МОВА – ГЭТА ВАЖНА!..

 Напярэдадні Міжнароднага дня роднай мовы, які адзначаўся 21 лютага, сябры Гомельскага раённага клуба ЮНЕСКА “Наш час” абвясцілі аб старце інтэрнет-акцыі “Беларуская – самая мая!”.

Міжнародны дзень роднай мовы, які сёлета святкаваўся ўжо ў пятнаццаты раз, быў абвешчаны Генеральнай канферэнцыяй ЮНЕСКА ў лістападзе 1999 года для садзейнічання моўнай і культурнай разнастайнасці і шматмоўю.

Гэтая дата была выбрана як напамін аб падзеях 21 лютага 1952 года, калі ў Бангладэшы ад куль паліцэйскіх загінулі студэнты – удзельнікі дэманстрацыі ў абарону сваёй роднай мовы бенгалі, якую яны патрабавалі прызнаць адной з дзяржаўных моў краіны.

Мова з’яўляецца найбольш моцным інструментам захавання і развіцця нашай культурнай спадчыны ў яго матэрыяльных і нематэрыяльных формах. Кожная дзейнасць па садзейнічанні распаўсюджанню роднай мовы дапаможа не толькі лінгвістычнай разнастайнасці і шматмоўю, але і больш поўнаму разуменню моўных і культурных традыцый ва ўсім свеце, а таксама салідарнасці на аснове разумення, талерантнасці і дыялогу.

Тэма Дня 2015 года была абрана наступная – “Інклюзіўная адукацыя праз і пры дапамозе мовы. Мовы – гэта важна”.

Сутнасць акцыі раённага клуба ЮНЕСКА “Наш час” заключалася ў тым, што кожны яе ўдзельнік напярэдадні Дня роднай мовы даслаў не менш, чым 5 сябрам і знаёмым у сацыяльных сетках паштоўку-віншаванне з Міжнародным днём роднай мовы.

Сваю цікавасць да акцыі праявілі звыш 150 удзельнікаў – карыстальнікаў сацыяльнымі сеткамі “Вконтакте”, “Одноклассники” і Facebook.